ਬਰੈਮਪਟਨ ਪਲਾਜ਼ਾ ‘ਚ ਫਾਇਰਿੰਗ ਕਰਨ ਵਾਲੇ ਭਾਰਤੀ ਮੂਲ ਦੇ ਤਿੰਨ ਭਰਾ ਗ੍ਰਿਫਤਾਰ

ਬਰੈਮਪਟਨ/ਇਸ਼ਮਾਨ ਸੋਹੀ 

ਕੈਨੇਡਾ ਦੀ ਪੀਲ ਰੀਜਨਲ ਪੁਲਿਸ  ਨੇ ਬਰੈਮਪਟਨ ਵਿੱਚ ਦੋ ਟੋਅ-ਟਰੱਕ ਗਰੁੱਪਾਂ (Rival Tow-truck Groups) ਵਿਚਕਾਰ ਹੋਈ ਹਿੰਸਕ ਝੜਪ ਅਤੇ ਗੋਲੀਬਾਰੀ ਦੇ ਮਾਮਲੇ ਵਿੱਚ ਭਾਰਤੀ ਮੂਲ ਦੇ ਤਿੰਨ ਟਰੱਕ ਡਰਾਈਵਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਨੇ ਘਟਨਾ ਦਾ ਵੀਡੀਓ ਫੁਟੇਜ ਜਾਰੀ ਕਰਦੇ ਹੋਏ ਦੱਸਿਆ ਕਿ ਗ੍ਰਿਫਤਾਰ ਕੀਤੇ ਗਏ ਤਿੰਨੋਂ ਮੁਲਜ਼ਮ ਸਕੇ ਭਰਾ ਹਨ, ਜਦਕਿ ਇਸ ਮਾਮਲੇ ਵਿੱਚ ਸ਼ਾਮਲ ਇੱਕ ਚੌਥੇ ਸ਼ੱਕੀ ਦੀ ਭਾਲ ਅਜੇ ਵੀ ਜਾਰੀ ਹੈ। ਇਹ ਗ੍ਰਿਫਤਾਰੀ ਲੰਬੀ ਜਾਂਚ ਅਤੇ ਵੀਡੀਓ ਸਬੂਤਾਂ ਦੇ ਆਧਾਰ ‘ਤੇ ਕੀਤੀ ਗਈ ਹੈ।

ਪੁਲਿਸ ਰਿਪੋਰਟ ਮੁਤਾਬਕ, ਗੋਲੀਬਾਰੀ ਦੀ ਇਹ ਘਟਨਾ 7 ਅਕਤੂਬਰ ਨੂੰ ਸਥਾਨਕ ਸਮੇਂ ਅਨੁਸਾਰ ਰਾਤ ਕਰੀਬ 10:45 ਵਜੇ ਹੋਈ ਸੀ। ਇਹ ਵਾਰਦਾਤ ਮੈਕਵੀਨ ਡਰਾਈਵ ਅਤੇ ਕੈਸਲਮੋਰ ਰੋਡ ਦੇ ਕੋਲ ਸਥਿਤ ਇੱਕ ਪਾਰਕਿੰਗ ਲਾਟ ਵਿੱਚ ਹੋਈ। ਉੱਥੇ ਦੋ ਵੱਖ-ਵੱਖ ਗੁੱਟਾਂ ਵਿਚਕਾਰ ਕਿਸੇ ਗੱਲ ਨੂੰ ਲੈ ਕੇ ਤਕਰਾਰ ਹੋਇਆ, ਜਿਸ ਤੋਂ ਬਾਅਦ ਉੱਥੇ ਗੋਲੀਆਂ ਚੱਲ ਗਈਆਂ। ਇਸ ਝੜਪ ਵਿੱਚ ਇੱਕ ਵਿਅਕਤੀ ਜ਼ਖਮੀ ਹੋ ਗਿਆ ਸੀ, ਹਾਲਾਂਕਿ ਉਸਦੀਆਂ ਸੱਟਾਂ ਗੰਭੀਰ ਨਹੀਂ ਸਨ।

ਘਰ ‘ਤੇ ਛਾਪਾ ਮਾਰ ਕੇ ਕੀਤੀ ਗ੍ਰਿਫਤਾਰੀ

ਘਟਨਾ ਤੋਂ ਬਾਅਦ ਪੁਲਿਸ ਨੇ ਵਿਆਪਕ ਜਾਂਚ ਸ਼ੁਰੂ ਕੀਤੀ ਅਤੇ ਇੱਕ ਗੁੱਟ ਨਾਲ ਜੁੜੇ ਤਿੰਨ ਵਿਅਕਤੀਆਂ ਦੀ ਪਛਾਣ ਕੀਤੀ। ਇਸ ਤੋਂ ਬਾਅਦ, 20 ਨਵੰਬਰ ਨੂੰ ਪੁਲਿਸ ਨੇ ਕੈਲੇਡਨ ਸਥਿਤ ਇੱਕ ਰਿਹਾਇਸ਼ ‘ਤੇ ਸਰਚ ਵਾਰੰਟ ਤਾਮੀਲ ਕਰਦੇ ਹੋਏ ਤਿੰਨਾਂ ਭਰਾਵਾਂ ਨੂੰ ਗ੍ਰਿਫਤਾਰ ਕਰ ਲਿਆ। ਮੁਲਜ਼ਮਾਂ ਦੀ ਪਛਾਣ ਮਨਜੋਤ ਭੱਟੀ, ਨਵਜੋਤ ਭੱਟੀ ਅਤੇ ਅਮਨਜੋਤ ਭੱਟੀ ਵਜੋਂ ਹੋਈ ਹੈ।

1. ਮਨਜੋਤ ਭੱਟੀ: ਉਸ ‘ਤੇ ਸਭ ਤੋਂ ਗੰਭੀਰ ਦੋਸ਼ ਲੱਗੇ ਹਨ। ਇਨ੍ਹਾਂ ਵਿੱਚ ਲਾਪਰਵਾਹੀ ਨਾਲ ਹਥਿਆਰ ਚਲਾਉਣਾ, ਲੋਡ ਕੀਤਾ ਪਾਬੰਦੀਸ਼ੁਦਾ ਹਥਿਆਰ ਰੱਖਣਾ, ਹਥਿਆਰ ਨੂੰ ਲਾਪਰਵਾਹੀ ਨਾਲ ਸਟੋਰ ਕਰਨਾ, ਛੁਪਿਆ ਹੋਇਆ ਹਥਿਆਰ ਲੈ ਕੇ ਜਾਣਾ ਅਤੇ ਇਹ ਜਾਣਦੇ ਹੋਏ ਵੀ ਗੱਡੀ ਵਿੱਚ ਬੈਠਣਾ ਕਿ ਉਸ ਵਿੱਚ ਹਥਿਆਰ ਹੈ, ਸ਼ਾਮਲ ਹਨ। ਫਿਲਹਾਲ ਉਸਦੀ ਜ਼ਮਾਨਤ ਸੁਣਵਾਈ ਓਨਟਾਰੀਓ ਕੋਰਟ ਆਫ਼ ਜਸਟਿਸ ਵਿੱਚ ਲੰਬਿਤ ਹੈ ਅਤੇ ਉਸਨੂੰ ਜ਼ਮਾਨਤ ‘ਤੇ ਰਿਹਾਅ ਕਰ ਦਿੱਤਾ ਗਿਆ ਹੈ।

2. ਨਵਜੋਤ ਅਤੇ ਅਮਨਜੋਤ ਭੱਟੀ: ਇਨ੍ਹਾਂ ਦੋਵਾਂ ‘ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਇਹ ਜਾਣਦੇ ਹੋਏ ਵਾਹਨ ਵਿੱਚ ਸਫ਼ਰ ਕੀਤਾ ਕਿ ਉਸ ਵਿੱਚ ਇੱਕ ਹਥਿਆਰ ਮੌਜੂਦ ਸੀ। ਦੋਵਾਂ ਨੂੰ ਰਿਹਾਅ ਕਰ ਦਿੱਤਾ ਗਿਆ ਹੈ ਅਤੇ ਉਨ੍ਹਾਂ ਨੂੰ ਬਾਅਦ ਵਿੱਚ ਅਦਾਲਤ ਵਿੱਚ ਪੇਸ਼ ਹੋਣਾ ਪਵੇਗਾ।

ਚੌਥੇ ਮੁਲਜ਼ਮ ਦੀ ਭਾਲ ਤੇਜ਼

ਪੀਲ ਪੁਲਿਸ ਨੇ ਦੱਸਿਆ ਕਿ ਵੀਡੀਓ ਵਿੱਚ ਗੋਲੀ ਚਲਾਉਂਦੇ ਹੋਏ ਦਿਖਾਈ ਦੇਣ ਵਾਲੇ ਵਿਅਕਤੀ ਦੀ ਪਛਾਣ ਅਜੇ ਨਹੀਂ ਹੋ ਸਕੀ ਹੈ। ਪੁਲਿਸ ਨੇ ਉਸਦਾ ਹੁਲੀਆ ਜਾਰੀ ਕੀਤਾ ਹੈ। ਸ਼ੱਕੀ ਨੂੰ ਇੱਕ ‘ਸਾਊਥ ਏਸ਼ੀਅਨ ਪੁਰਸ਼’ ਵਜੋਂ ਦੱਸਿਆ ਗਿਆ ਹੈ, ਜੋ ਵੀਡੀਓ ਵਿੱਚ ਕਾਲੀ ਜੈਕਟ, ਨੀਲੀ ਜੀਨਸ ਅਤੇ ਸਫੈਦ ਰਨਿੰਗ ਸ਼ੂਜ਼ ਪਹਿਨੇ ਹੋਏ ਦਿਖਾਈ ਦੇ ਰਿਹਾ ਹੈ। ਪੁਲਿਸ ਉਸਦੀ ਸਰਗਰਮੀ ਨਾਲ ਭਾਲ ਕਰ ਰਹੀ ਹੈ। ਖਬਰ ਨੂੰ ਵੱਧ ਤੋ ਵੱਧ ਅੱਗੇ ਸ਼ੇਅਰ ਕਰੋ-