ਬੀ.ਬੀ.ਕੇ ਡੀ.ਏ.ਵੀ ਕਾਲਜ ਫਾਰ ਵੂਮੈਨ ਅੰਮ੍ਰਿਤਸਰ ਦੇ ਅਧਿਆਪਕਾਂ ਨੇ ਕੀਤੀ ਭੁੱਖ ਹੜਤਾਲ

ਅੰਮ੍ਰਿਤਸਰ/ਉਪਿੰਦਰਜੀਤ ਸਿੰਘ 

ਬੀ.ਬੀ.ਕੇ ਡੀ.ਏ.ਵੀ ਕਾਲਜ ਫਾਰ ਵੂਮੈਨ ਦੇ ਅਧਿਆਪਕਾਂ ਨੇ ਡੀ.ਏ.ਵੀ ਕਾਲਜ ਪ੍ਰਬੰਧਕ ਕਮੇਟੀ ਦੁਆਰਾ ਐਚ ਐਮ ਵੀ ਨੂੰ ਅਟੌਨਮੀ ਕਾਲਜ ਬਣਾਉਣ ਦਾ ਫੈਸਲਾ ਲੈਣ ਦੀ ਮੰਗ ਨੂੰ ਲੈ ਕੇ ਭੁੱਖ ਹੜਤਾਲ ਕੀਤੀ। ਡਾ. ਅਦਿਤੀ ਜੈਨ, ਡਾ. ਪ੍ਰਿਯੰਕਾ ਬੱਸੀ, ਸ਼੍ਰੀਮਤੀ ਪ੍ਰਿਆ ਸ਼ਰਮਾ ਆਪਣੀਆਂ ਜਾਇਜ਼ ਅਤੇ ਲੰਬੇ ਸਮੇਂ ਤੋਂ ਪੈਡਿੰਗ ਮੰਗਾਂ ਨੂੰ ਪ੍ਰਬੰਧਕ ਕਮੇਟੀ ਤੋਂ ਮਨਜ਼ੂਰ ਕਰਵਾਉਣ ਲਈ 6 ਘੰਟੇ ਦੀ ਭੁੱਖ ਹੜਤਾਲ ‘ਤੇ ਸਨ। ਜ਼ਿਕਰਯੋਗ ਹੈ ਕਿ ਕੇਂਦਰ ਸਰਕਾਰ ਨੇ 2016 ਵਿੱਚ 7ਵਾਂ ਪੇ ਕਮਿਸ਼ਨ ਮਨਜ਼ੂਰ ਕਰ ਦਿੱਤਾ ਸੀ ਪਰ 9 ਸਾਲਾਂ ਬਾਅਦ ਵੀ ਕਾਲਜ ਅਧਿਆਪਕ ਆਪਣੀਆਂ ਜਾਇਜ਼ ਤਨਖਾਹਾਂ ਲਈ ਸੰਘਰਸ਼ ਕਰ ਰਹੇ ਹਨ। ਇਸ ਮੌਕੇ ਬੋਲਦੇ ਹੋਏ ਪੀਸੀਸੀਟੀਯੂ ਦੀ ਪ੍ਰਧਾਨ ਅਤੇ ਕਾਲਜ ਦੀ ਯੂਨਿਟ ਮੁਖੀ ਡਾ. ਸੀਮਾ ਜੇਟਲੀ ਨੇ ਕਿਹਾ ਕਿ ਇਹ ਸਹੀ ਸਮਾਂ ਹੈ ਕਿ ਅਧਿਆਪਕ ਭਾਈਚਾਰੇ ਦੇ ਅਸਲ ਅਧਿਕਾਰਾਂ ਅਤੇ ਲੰਬੇ ਸਮੇਂ ਤੋਂ ਪੈਡਿੰਗ ਮੰਗਾਂ ਨੂੰ ਗੰਭੀਰਤਾ ਅਤੇ ਇਮਾਨਦਾਰੀ ਨਾਲ ਹੱਲ ਕੀਤਾ ਜਾਵੇ। ਉਨ੍ਹਾਂ ਅੱਗੇ ਕਿਹਾ ਕਿ ਅਸੀਂ ਸ਼ਾਂਤਮਈ ਵਿਰੋਧ ਪ੍ਰਦਰਸ਼ਨ ਲਈ ਵਚਨਬੱਧ ਹਾਂ ਅਤੇ ਸਾਰੇ ਫੈਕਲਟੀ ਮੈਂਬਰਾਂ ਨੂੰ ਇਨਸਾਫ਼ ਲਈ ਇਸ ਮਹੱਤਵਪੂਰਨ ਸੰਘਰਸ਼ ਵਿੱਚ ਏਕਤਾ, ਮਾਣ ਅਤੇ ਦ੍ਰਿੜਤਾ ਬਣਾਈ ਰੱਖਣ ਦੀ ਅਪੀਲ ਕਰਦੇ ਹਾਂ।

ਪੰਜਾਬ ਐਡ ਚੰਡੀਗੜ੍ਹ ਕਾਲਜ ਟੀਚਰਜ਼ ਯੂਨੀਅਨ (ਪੀਸੀਸੀਟੀਯੂ) ਨੇ ਡੀ.ਏ.ਵੀ ਕਾਲਜ ਪ੍ਰਬੰਧਕ ਕਮੇਟੀ (ਸੀਐਮਸੀ), ਨਵੀਂ ਦਿੱਲੀ ਦੇ ਲਗਾਤਾਰ ਉਦਾਸੀਨ ਅਤੇ ਪੱਖਪਾਤੀ ਰਵੱਈਏ ਦੇ ਜਵਾਬ ਵਿੱਚ ਪੰਜਾਬ ਦੇ ਡੀ.ਏ.ਵੀ ਕਾਲਜਾਂ ਵਿੱਚ ਕਈ ਵਿਰੋਧ ਪ੍ਰਦਰਸ਼ਨਾਂ ਦਾ ਐਲਾਨ ਕੀਤਾ ਹੈ। ਡੀ.ਏ.ਵੀ ਕਾਲਜ ਕੋਆਰਡੀਨੇਸ਼ਨ ਕਮੇਟੀ ਦੁਆਰਾ ਪਹਿਲਾਂ ਕੀਤੇ ਗਏ ਪ੍ਰਤੀਕਾਤਮਕ ਵਿਰੋਧ ਪ੍ਰਦਰਸ਼ਨਾਂ ਦੇ ਬਾਵਜੂਦ, ਪ੍ਰਸ਼ਾਸਨ ਅਧਿਆਪਕਾਂ ਦੀਆਂ ਜਾਇਜ਼ ਮੰਗਾਂ ਨੂੰ ਹੱਲ ਕਰਨ ਵਿੱਚ ਅਸਫਲ ਰਿਹਾ ਹੈ। ਉਜਾਗਰ ਕੀਤੇ ਗਏ ਮੁੱਦਿਆਂ ਵਿੱਚ ਐਚਐਮਵੀ ਕਾਲਜ ਜਲੰਧਰ ਨੂੰ ਖੁਦਮੁਖਤਿਆਰ ਦਰਜਾ ਦੇਣ, ਰੈਗੂਲਰ ਫੈਕਲਟੀ ਲਈ 7ਵੇਂ ਪੇ ਕਮਿਸ਼ਨ ਨੂੰ ਲਾਗੂ ਕਰਨ ਸੰਬੰਧੀ ਪੱਖਪਾਤੀ ਅਭਿਆਸ, 1925 ਅਸਾਮੀਆਂ ਦੇ ਵਿਰੁੱਧ ਨਿਯੁਕਤ ਅਧਿਆਪਕਾਂ ਦੀ ਮੂਲ ਤਨਖਾਹ ‘ਤੇ ਸੀਪੀਐਫ ਵਿੱਚ ਕਟੌਤੀਆਂ, ਕਰੀਅਰ ਐਡਵਾਂਸਮੈਂਟ ਸਕੀਮ (ਸੀਏਐਸ) ਤਰੱਕੀਆਂ ਵਿੱਚ ਦੇਰੀ ਅਤੇ ਕੁਝ ਕਾਲਜਾਂ ਵਿੱਚ ਸੀਏਐਸ ਅਤੇ ਤਨਖਾਹ ਮਾਮਲਿਆਂ ਨਾਲ ਸਬੰਧਤ ਬਕਾਏ ਦਾ ਭੁਗਤਾਨ ਨਾ ਕਰਨਾ ਸ਼ਾਮਲ ਹੈ।

ਪ੍ਰਬੰਧਕ ਕਮੇਟੀ ਦੀ ਇਸ ਲਗਾਤਾਰ ਲਾਪਰਵਾਹੀ ਦੇ ਮੱਦੇਨਜ਼ਰ, ਕਾਰਜਕਾਰੀ ਕਮੇਟੀ ਨੇ ਸਰਬਸੰਮਤੀ ਨਾਲ ਵਿਰੋਧ ਕਾਰਵਾਈਆਂ ਦਾ ਇੱਕ ਵਿਸਤ੍ਰਿਤ ਸ਼ਡਿਊਲ ਸ਼ੁਰੂ ਕਰਨ ਦਾ ਫੈਸਲਾ ਕੀਤਾ ਹੈ। ਇਨ੍ਹਾਂ ਵਿੱਚ 21 ਅਤੇ 22 ਅਪ੍ਰੈਲ 2025 ਨੂੰ ਕਾਲੇ ਬਿੱਲੇ ਦੇ ਵਿਰੋਧ ਪ੍ਰਦਰਸ਼ਨ, 23 ਅਤੇ 24 ਅਪ੍ਰੈਲ ਨੂੰ ਹੜਤਾਲ-ਕਮ-ਧਰਨਾ ਅਤੇ 25 ਅਪ੍ਰੈਲ ਨੂੰ ਜਲੰਧਰ ਵਿਖੇ ਇੱਕ ਮੋਮਬੱਤੀ ਮਾਰਚ ਵਿਰੋਧ ਸ਼ਾਮਲ ਹੈ। ਇਸ ਤੋਂ ਇਲਾਵਾ 26 ਅਪ੍ਰੈਲ ਨੂੰ ਸਾਰੇ ਕੈਂਪਸਾਂ ਵਿੱਚ ਇੱਕ ਦਿਨ ਦੀ ਭੁੱਖ ਹੜਤਾਲ ਤਹਿ ਕੀਤੀ ਗਈ ਹੈ, ਜਿਸ ਤੋਂ ਬਾਅਦ 28 ਅਪ੍ਰੈਲ ਨੂੰ ਇੱਕ ਹੋਰ ਹੜਤਾਲ-ਕਮ-ਧਰਨਾ ਹੋਵੇਗਾ। ਅਧਿਆਪਕ 29 ਅਪ੍ਰੈਲ 2025 ਨੂੰ ਨਵੀਂ ਦਿੱਲੀ ਵਿੱਚ ਡੀ.ਏ.ਵੀ ਸੀਐਮਸੀ ਹੈੱਡਕੁਆਰਟਰ ਵਿਖੇ ਇੱਕ ਵਿਰੋਧ ਧਰਨੇ ਲਈ ਵੀ ਇਕੱਠੇ ਹੋਣਗੇ। 2 ਮਈ ਨੂੰ ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਵਿਖੇ ਇੱਕ ਵਿਰੋਧ ਪ੍ਰਦਰਸ਼ਨ ਅਤੇ 30 ਅਪ੍ਰੈਲ ਤੋਂ 3 ਮਈ 2025 ਤੱਕ ਐਚਐਮਵੀ ਕਾਲਜ ਜਲੰਧਰ ਦੇ ਅਧਿਆਪਕਾਂ ਦੁਆਰਾ ਐਕਸਟੈਂਡਿਡ ਹੋਈ ਭੁੱਖ ਹੜਤਾਲ ਸਮੇਤ ਹੋਰ ਪ੍ਰਦਰਸ਼ਨਾਂ ਦੀ ਯੋਜਨਾ ਬਣਾਈ ਗਈ ਹੈ। ਜੇਕਰ ਸ਼ਿਕਾਇਤਾਂ ਦਾ ਹੱਲ ਨਹੀਂ ਹੁੰਦਾ, ਤਾਂ ਅਧਿਆਪਕਾਂ ਨੇ ਮਰਨ ਤੱਕ ਭੁੱਖ ਹੜਤਾਲ ਕਰਨ ਦੀ ਧਮਕੀ ਦਿੱਤੀ ਹੈ। ਕਾਲਜ ਦੇ ਸਾਰੇ ਫੈਕਲਟੀ ਮੈਂਬਰ ਵੀ ਧਰਨੇ ਦੌਰਾਨ ਮੌਜੂਦ ਸਨ।ਖਬਰ ਨੂੰ ਵੱਧ ਤੋ ਵੱਧ ਅੱਗੇ ਸ਼ੇਅਰ ਕਰੋ-