ਜਾਣੋ ਕੌਣ ਹੈ ਚਿੱਟੇ ਨਾਲ ਫੜ੍ਹੀ ਗਈ ਅਮਨਦੀਪ ਕੌਰ ?14 ਸਾਲ ਦੀ ਸਰਵਿਸ ‘ਚ ਇਸ ਪੁਲਿਸ ਮੁਲਾਜਮ ਦੇ 31 ਵਾਰ ਹੋਏ ਤਬਾਦਲੇ, 2 ਵਾਰ ਹੋਈ ਸਸਪੈਂਡ

ਬਠਿੰਡਾ/ਬਾਰਡਰ ਨਿਊਜ ਸਰਵਿਸ

ਪੰਜਾਬ ਪੁਲਿਸ ਦੀ ਮਹਿਲਾ ਕਾਂਸਟੇਬਲ ਅਮਨਦੀਪ ਕੌਰ ਇਨ੍ਹੀਂ ਦਿਨੀਂ ਸੁਰਖੀਆਂ ਵਿੱਚ ਹੈ। ਅਮਨਦੀਪ ਕੌਰ ਨੂੰ ਪੰਜਾਬ ਪੁਲਿਸ ਦੀ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਹੈ। ਉਸਨੇ ਅਜਿਹਾ ਅਪਰਾਧ ਕੀਤਾ ਹੈ ਜਿਸ ਕਾਰਨ ਪੁਲਿਸ ਨੇ ਹੁਣ ਉਸਦੇ ਖਿਲਾਫ ਸਖ਼ਤ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਅਮਨਦੀਪ ਕੌਰ ਬਠਿੰਡਾ ਦੇ ਪਿੰਡ ਚੱਕ ਫਤੇ ਸਿੰਘ ਵਾਲਾ ਦੇ ਇੱਕ ਗਰੀਬ ਦਲਿਤ ਪਰਿਵਾਰ ਨਾਲ ਸਬੰਧਤ ਹੈ। ਪਰ ਉਸਦੀ ਇੰਸਟਾਗ੍ਰਾਮ ਪ੍ਰੋਫਾਈਲ ਤੋਂ ਪਤਾ ਲੱਗਦਾ ਹੈ ਕਿ ਉਹ ਇੱਕ ਆਲੀਸ਼ਾਨ ਜ਼ਿੰਦਗੀ ਜੀ ਰਹੀ ਸੀ। ਅਮਨਦੀਪ ਕੌਰ ਦੇ ਪਿਤਾ ਇੱਕ ਮਿਸਤਰੀ ਹਨ ਅਤੇ ਉਸਦਾ ਭਰਾ ਇੱਕ ਨਿੱਜੀ ਫਰਮ ਵਿੱਚ ਕੰਮ ਕਰਦਾ ਹੈ। ਉਸਦੀ ਇੱਕ ਭੈਣ ਹੈ ਜੋ ਵਿਆਹੀ ਹੋਈ ਹੈ। ਜਦੋਂ ਅਮਨਦੀਪ ਕੌਰ ਨੂੰ 2011 ਵਿੱਚ ਸਰਕਾਰੀ ਨੌਕਰੀ ਮਿਲੀ, ਤਾਂ ਉਸਦੇ ਪਰਿਵਾਰ ਨੂੰ ਉਮੀਦ ਸੀ ਕਿ ਇਹ ਨੂੰ ਹੁਣ ਉਹ ਗਰੀਬੀ ਤੋਂ ਬਾਹਰ ਨਿਕਲ ਸਕਣਗੇ । ਪਰ ਹੁਣ, ਗਰੀਬੀ ਤਾਂ ਦੂਰ ਪੂਰੇ ਪਰਿਵਾਰ ‘ਤੇ ਇੱਕ ਨਵਾਂ ਸੰਕਟ ਆ ਗਿਆ ਹੈ। ਇਸਦਾ ਕਾਰਨ ਖੁਦ ਅਮਨਦੀਪ ਕੌਰ ਹੈ।

ਪਿੰਡ ਵਾਸੀਆਂ ਨੇ ਕਿਹਾ ਕਿ ਪਰਿਵਾਰ ਅਜੇ ਵੀ ਉਨ੍ਹਾਂ ਹੀ ਹਾਲਾਤਾਂ ਵਿੱਚ ਰਹਿ ਰਿਹਾ ਹੈ ਜਿਵੇਂ ਪਹਿਲਾਂ ਰਹਿੰਦਾ ਸੀ। ਪਰ ਇੱਥੇ ਅਮਨਦੀਪ ਦੀ ਜ਼ਿੰਦਗੀ ਕੁਝ ਸਾਲਾਂ ਵਿੱਚ ਹੀ ਬਹੁਤ ਬਦਲ ਗਈ। ਪਿੰਡ ਵਾਸੀਆਂ ਨੇ ਕਿਹਾ ਕਿ ਅਮਨਦੀਪ ਦੇ ਪਰਿਵਾਰ ਨੇ ਬਹੁਤ ਸਮਾਂ ਪਹਿਲਾਂ ਉਸ ਨਾਲੋਂ ਨਾਤਾ ਤੋੜ ਲਿਆ ਸੀ। ਰਾਡੋ ਅਤੇ ਰੋਲੈਕਸ ਘੜੀਆਂ ਅਤੇ ਗੁਚੀ ਐਨਕਾਂ ਦਾ ਸ਼ੋਅ ਕਰਨ ਲਈ ਜਾਣੀ ਜਾਂਦੀ ਅਮਨਦੀਪ ਕੌਰ ਕਥਿਤ ਤੌਰ ‘ਤੇ ਬਠਿੰਡਾ ਵਿੱਚ ਇੱਕ ਪੌਸ਼ ਕਲੋਨੀ ਵਿੱਚ ਇੱਕ ਆਲੀਸ਼ਾਨ ਜ਼ਿੰਦਗੀ ਬਤੀਤ ਕਰਦੀ ਸੀ। ਦੱਸਿਆ ਜਾਂਦਾ ਹੈ ਕਿ ਉਸ ਕੋਲ ਇੱਕ ਥਾਰ, ਇੱਕ ਰਾਇਲ ਐਨਫੀਲਡ ਬਾਈਕ ਅਤੇ ਇੱਕ ਸਕੂਟਰ ਵੀ ਹੈ।

ਅਮਨਦੀਪ ਵਿਆਹੀ ਹੋਈ ਹੈ ਅਤੇ ਵਿਆਹ ਤੋਂ ਤੁਰੰਤ ਬਾਅਦ ਹੀ ਉਸਦਾ ਆਪਣੇ ਪਤੀ ਨਾਲ ਵਿਵਾਦ ਹੋ ਗਿਆ। 2015 ਵਿੱਚ, ਬਠਿੰਡਾ ਵਿੱਚ ਤਾਇਨਾਤ ਇੱਕ ਆਈਪੀਐਸ ਅਧਿਕਾਰੀ ਨੇ ਇੱਕ ਵਾਰ ਉਸਦੇ ਪਤੀ ਨੂੰ ਧਮਕੀ ਦਿੱਤੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਉਹੀ ਆਈਪੀਐਸ ਅਧਿਕਾਰੀ ਹੈ ਜਿਸ ਨਾਲ ਅਮਨਦੀਪ ਨੇ ਬੁੱਧਵਾਰ ਨੂੰ ਆਪਣੀ ਗ੍ਰਿਫਤਾਰੀ ਸਮੇਂ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। ਜਦੋਂ ਬੁੱਧਵਾਰ ਨੂੰ ਉਸਨੂੰ ਪੁੱਛਗਿੱਛ ਲਈ ਹਿਰਾਸਤ ਵਿੱਚ ਲਿਆ ਗਿਆ, ਤਾਂ ਅਮਨਦੀਪ ਕੌਰ ਨੇ ਸੀਨੀਅਰ ਅਧਿਕਾਰੀ ਨਾਲ ਆਪਣੇ ਕਰੀਬੀ ਸਬੰਧਾਂ ਨੂੰ ਦਰਸਾਉਣ ਲਈ ਵਟਸਐਪ ਸੁਨੇਹੇ, ਚੈਟ ਅਤੇ ਫੋਟੋਆਂ ਦਿਖਾਈਆਂ।

ਕਾਂਸਟੇਬਲ ਅਮਨਦੀਪ ਕੌਰ ਦਾ ਵਿਵਾਦਾਂ ਨਾਲ ਰਿਹਾ ਹੈ ਪੁਰਾਣ ਨਾਤਾ 

3 ਸਾਲ ਪਹਿਲਾਂ ਵੀ ਇਸ ਨੇ ਹਾਈ ਵੋਲਟੇਜ ਡਰਾਮਾ ਕੀਤਾ ਸੀ। 2022 ‘ਚ ਇਸ ਨੇ SSP ਦਫ਼ਤਰ ਬਠਿੰਡਾ ‘ਚ ਫਿਨਾਇਲ ਪੀਤੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਡਰਾਮਾ ਇਸ ਨੇ ਕੁੱਟਮਾਰ ਦੇ ਮਾਮਲੇ ‘ਚ ਗ੍ਰਿਫ਼ਤਾਰੀ ਤੋਂ ਬਚਣ ਲਈ ਕੀਤਾ ਸੀ। ਅਮਨਦੀਪ ਕੌਰ ਵੱਲੋਂ 2022 ‘ਚ ਬਠਿੰਡਾ ਸਿਵਲ ਹਸਪਤਾਲ ‘ਚ ਵੀ ਹੰਗਾਮਾ ਕੀਤਾ ਸੀ। ਇਸ ਕਾਂਸਟੇਬਲ ਨਾਲ ਰਲ ਕੇ ਬਲਵਿੰਦਰ ਨੇ ਪਤਨੀ ਨੂੰ ਕੁੱਟਿਆ ਸੀ। ਕੁੱਟਮਾਰ ਤੋਂ ਬਾਅਦ ਦੋਵੇਂ ਬਠਿੰਡਾ ਹਸਪਤਾਲ ‘ਚ ਭਰਤੀ ਹੋ ਗਏ ਸਨ। ਦੋਹਾਂ ਨੇ ਡਾਕਟਰਾਂ-ਨਰਸਾਂ ਨਾਲ ਬਦਸਲੂਕੀ ਕੀਤੀ ਸੀ। ਜਿਸ ਤੋਂ ਬਾਅਦ ਡਾਕਟਰ ਤੇ ਨਰਸ ਹੜਤਾਲ ‘ਤੇ ਚਲੇ ਗਏ। ਪੁਲਿਸ ਨੇ ਡਾਕਟਰ ਦੇ ਬਿਆਨ ‘ਤੇ ਦੋਹਾਂ ਖਿਲਾਫ਼ ਪਰਚਾ ਦਰਜ ਕਰ ਲਿਆ ਸੀ। ਕੇਸ ਦਰਜ ਹੋਣ ‘ਤੇ ਅਮਨਦੀਪ ਕੌਰ ਨੇ ਖੂਬ ਹੰਗਾਮਾ ਕੀਤਾ ਸੀ। ਹਸਪਤਾਲ ‘ਚ ਫਿਨਾਇਲ ਦੀਆਂ ਗੋਲੀਆਂ ਨਿਗਲਣ ਦੀ ਕੋਸ਼ਿਸ਼ ਕੀਤੀ ਸੀ। ਅਮਨਦੀਪ ਕੌਰ ਦੀ 14 ਸਾਲ ਦੀ ਸਰਵਿਸ ਵਿੱਚ 31 ਵਾਰ ਤਬਾਦਲੇ ਹੋਏ, 2 ਵਾਰ ਸਸਪੈਂਡ ਹੋਈ। ਅਮਨਦੀਪ ਕੌਰ 26 ਨਵੰਬਰ 2011 ਨੂੰ ਪੁਲਿਸ ‘ਚ ਭਰਤੀ ਹੋਈ ਸੀ। ਖਬਰ ਨੂੰ ਵੱਧ ਤੋ ਵੱਧ ਅੱਗੇ ਸ਼ੇਅਰ ਕਰੋ-