ਅੰਮ੍ਰਿਤਸਰ /ਰਣਜੀਤ ਸਿੰਘ ਰਾਣਾਨੇਸ਼ਟਾ
ਸਰਬੱਤ ਖ਼ਾਲਸਾ ਵੱਲੋਂ ਥਾਪੇ ਗਏ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਭਾਈ ਜਗਤਾਰ ਸਿੰਘ ਹਵਾਰਾ ਨੇ ਪੰਜਾਬ ਦੇ ਹੜ੍ਹਾਂ ਦੇ ਸੰਕਟ ਨੂੰ ਗੰਭੀਰਤਾ ਨਾਲ ਲਿਆ ਹੈ ।ਉਨ੍ਹਾਂ ਵਲੋਂ ਦਿੱਲੀ ਜੇਲ੍ਹ ਤੋਂ ਜਾਰੀ ਕੀਤੇ ਬਿਆਨ ਨੂੰ ਧਰਮ ਪਿਤਾ ਬਾਪੂ ਗੁਰਚਰਨ ਸਿੰਘ ਅਤੇ ਪ੍ਰੋਫੈਸਰ ਬਲਜਿੰਦਰ ਸਿੰਘ ਨੇ ਪ੍ਰੈਸ ਨੂੰ ਜਾਰੀ ਕੀਤਾ। ਜਥੇਦਾਰ ਹਵਾਰਾ ਨੇ ਕਿਹਾ ਪੰਜਾਬ ਦੇ ਮੌਜੂਦਾ ਹੜ੍ਹਾਂ ਦੇ ਸੰਕਟ ਨੂੰ ਕੁਦਰਤ ਦੀ ਮਾਰ ਕਹਿ ਕੇ ਮਸਲੇ ਨੂੰ ਦਫ਼ਨਾ ਦੇਣਾ ਸਿਆਣਪ ਨਹੀਂ।ਇਸਦੇ ਪਿੱਛੇ ਭਾਜਪਾ ਅਤੇ ਆਪ ਦੀ ਸਾਜਿਸ਼ ਨੂੰ ਬੇਨਕਾਬ ਕਰਨ ਲਈ ਵਿਦੇਸ਼ੀ ਸਿੱਖਾਂ ਨੂੰ ਅੰਤਰਰਾਸ਼ਟਰੀ ਭਾਈਚਾਰੇ ਨਾਲ ਮਿਲਕੇ ਜਾਂਚ ਕਰਵਾਉਣੀ ਚਾਹੀਦੀ ਹੈ।
ਜਥੇਦਾਰ ਹਵਾਰਾ ਨੇ ਕਿਹਾ ਦਿੱਲੀ ਵਿੱਚ ਸਰਕਾਰ ਭਾਵੇਂ ਕਿਸੇ ਵੀ ਪਾਰਟੀ ਦੀ ਹੋਵੇ ਪੰਜਾਬ ਪ੍ਰਤੀ ਨਜ਼ਰੀਆ ਹਮੇਸ਼ਾ ਬਦਲਾਖੋਰੀ ਤੇ ਨਫ਼ਰਤ ਦਾ ਰਿਹਾ ਹੈ। ਭਾਖੜਾ ਡੈਮ ਜੋ ਭਾਰਤ ਦੇ ਸਭ ਤੋਂ ਵੱਡੇ ਡੈਮਾਂ ਵਿੱਚੋਂ ਇੱਕ ਹੈ ਦਾ ਪ੍ਰਬੰਧਕੀ ਕੰਟਰੋਲ ਜਦ ਕੇਂਦਰ ਦੇ ਹੱਥਾਂ ਵਿੱਚ ਆਇਆ ਸੀ ਉਸ ਵੇਲੇ ਹੀ ਪੰਜਾਬ ਲਈ ਖ਼ਤਰੇ ਦੀ ਘੰਟੀਆਂ ਵੱਜਣ ਲੱਗ ਪਈਆਂ ਸਨ ਜੋ ਅੱਜ ਸਾਰੇ ਸੰਸਾਰ ਦੇ ਸਾਹਮਣੇ ਹੈ।ਜਥੇਦਾਰ ਹਵਾਰਾ ਨੇ ਦੋਸ਼ ਲਗਾਇਆ ਭਾਜਪਾ ਨੇ ਭਾਖੜਾ ਡੈਮ ਦਾ ਕੰਟਰੋਲ ਪੰਜਾਬ ਨੂੰ ਤਬਾਹ ਕਰਨ ਲਈ ਆਪਣੇ ਹੱਥਾਂ ਵਿੱਚ ਲਿਆ ਸੀ।ਸੰਕਟ ਦੀ ਘੜੀ ਵਿੱਚ ਅੱਜ ਪੰਜਾਬ ਹੀ ਪੰਜਾਬ ਦੇ ਨਾਲ ਖੜਾ ਹੈ।ਉਨ੍ਹਾਂ ਕਿਹਾ “ਕਿਸਾਨਾਂ,ਮਜ਼ਦੂਰਾਂ,ਬਜ਼ੁਰਗਾਂ, ਮਾਤਾਵਾਂ ਅਤੇ ਬੱਚਿਆਂ ਦੇ ਦੁੱਖ ਦਾ ਜੋ ਇਹਸਾਸ ਮੈਨੂੰ ਜੇਲ੍ਹ ਵਿੱਚ ਬੈਠਿਆ ਹੋ ਰਿਹਾ ਹੈ ੳਹ ਸ਼ਬਦਾਂ ਵਿੱਚ ਲਿਖਿਆ ਜਾਣਾ ਔਖਾ ਹੈ “ ।ਪੰਜਾਬ ਵਾਸੀਆਂ ਵੱਲੋਂ ਹੜ੍ਹ ਪੀੜਤਾਂ ਦੀ ਖੁੱਲ ਦਿਲੀ ਨਾਲ ਕੀਤੀ ਜਾ ਰਹੀ ਮਦਦ ਦੀ ਜਥੇਦਾਰ ਹਵਾਰਾ ਨੇ ਸ਼ਲਾਘਾ ਕੀਤੀ ਤੇ ਕਿਹਾ ਪਾਣੀ ਦੇ ਘੱਟਣ ਦੇ ਬਾਅਦ ਕਿਸਾਨ ਭਰਾਵਾਂ ਦੇ ਮੁੜ ਵਸੇਬੇ ਲਈ ਨਿਰੰਤਰ ਯਤਨ ਜਾਰੀ ਰਹਿਣੇ ਚਾਹੀਦੇ ਹਨ। ਵੱਡੇ ਕਿਸਾਨ ਵੀਰਾਂ ਨੂੰ ਅਪੀਲ ਹੈ ਟੀਮਾਂ ਬਣਾਕੇ ਛੋਟੇ ਕਿਸਾਨਾਂ ਦੀ ਜ਼ਮੀਨਾਂ ਵਾਹ ਕੇ ਦੇਣ ।
ਲੋਕਾਂ ਨੂੰ ਹੌਸਲਾ ਦਿੰਦੇ ਹੋਏ ਜਥੇਦਾਰ ਹਵਾਰਾ ਨੇ ਕਿਹਾ ਪੰਜਾਬ ਵਾਸੀਆਂ ਨੇ ਘੱਲੂਘਾਰਿਆਂ ਦੇ ਦੁੱਖ ਹੰਢਾਏ ਹਨ ਤੇ ਹੁਣ ਵੀ ਅਸੀ ਆਪਸੀ ਸਹਿਯੋਗ ਤੇ ਗੁਰੂ ਨਾਨਕ ਸਾਹਿਬ ਦੀਆਂ ਅਸੀਸਾਂ ਨਾਲ ਫੇਰ ਕਾਇਮ ਹੋਵਾਂਗੇ ਪਰ ਜ਼ਖ਼ਮ ਦੇਣ ਵਾਲੀਆਂ ਸਰਕਾਰਾਂ ਨੂੰ ਭੁੱਲਾਂਗੇ ਨਹੀਂ। ਖਬਰ ਨੂੰ ਵੱਧ ਤੋ ਵੱਧ ਅੱਗੇ ਸ਼ੇਅਰ ਕਰੋ-
Total views : 5915248